Ermuhan ata, qarttar úıiniń turǵyny: 

Ata-anasynan bólek turatyn orystardy kórgende jaǵamdy ustaýshy edim. "Sumdyq-aı, kúıeýiniń áke-sheshesin syılamaǵan kelinniń, sońynan erip ata-anasynan bezgen balanyń ana dúnıede jazasy bolar", - dep ózimdi ishteı jubatatynmyn. Taǵdyr degen qıyn eken ǵoı. Basqa salǵan soń kónedi ekensiń. Bir úıde ómirlik jarym, kishi ulym kelinmen jáne úsh nemeremmen turatyn baqytty otbasy boldyq. 63 jasyma deıin mektepte hımıa pániniń muǵalimi bolyp qyzmet istedim. Sodan kózimdi shel basyp, bir janarymnan aıyryldym. Sóıtip jumystan qol úzdim. Bir jyl ótpeı, báıbishem aty jaman dertten kóz jumdy. Sol kúnnen bastap kereksiz ekenimdi túsindim. Balam men kelinim men úshin kúnde kerisip jatatyn. Bir-eki ret ketip qaldy. İshteı bilip júrdim. Kempirimniń jylyn bergen soń, balam: "Kóke, úıde otyryp zerigip júrgenińizdi baıqap júrmin. Apamnyń ornyn eshkim basa almaıdy, bilem. Biraq men bir sheshimin taptym. Qarttar úıinde ózińizben qatar qurdastaryńyz bar. Aıtar áńgimelerińiz bolady. Onyń ústine jaǵdaı da jasalǵan eken. Biz sizge baryp turamyz. Úıge kelip qonaq bolyp turasyz", - dep ashyq aıtty. Áńgimeniń sońyn tyńdamadym. Birden kıimimdi jınap, daıyndala bastadym. Kókiregimdegi kernegen óksikten balama til qata almadym. Únsizdik. Tús aýa qarttar úıine keldik. Qujjatardy tirkep, sol jerde qaldym. Meni tastap ketip bara jatqan balama: 
-Men ómirden ótken soń, Quran oqytyp, sońǵy saparǵa shyǵaryp salsańdar boldy, - dedim. Qara shańyraqtaǵy ǵumyrymnyń jalǵasyn qarttar úıinde jalǵasaryn ómir túgili túsime de kirmepti. Sharıǵatta pende sanaly túrde ózine qol jumsaýǵa bolmaıdy. Áıtpese ólimge asyǵyp turamyn. Ómiriń maǵynaly bolsa, uzaq ǵumyr jasaǵanǵa ne jetsin?! Al qarttar úıinde qaı kúnniń ótip jatqanyn da bilmeısiń. Qazir munda tirishilik jasap jatqanyma úsh jyldan asty. Tirishilik deımin-aý, áıteýir janbaǵys. Aıyna bir ret balam kelip turady. Al kelinim men nemerelerimdi osy jerge kelgeli beri kórmedim. Munda tıisinshe jaǵdaı jasalǵan. Biraq kóńiliń toq bolmasa, kóılegińniń kók bolǵanynan ne paıda?!.... 

(Ermuhan ata, kóńili bosap, áńgimesiniń sońyna deıin aıaqtaı almady...)

Záýresh Sypataeva